武術世家紙紮佬 獅頭紮作夢追逐40年

「如果我冇咗紮作，我唔能夠維生。我覺得真係『紮作人生』，除咗紮作，我冇其他。」

許嘉雄師傅出生自武術家庭，即使自小浸淫於功夫、舞獅與舞麒麟的環境，都未有使他想繼承父業，反而因經常接觸舞獅的緣故，年紀少少就燃起一個「獅頭紮作夢」。6歲為追逐遙不可及的夢想，將武館破爛獅頭修修補補；11歲將人生第一個親手製作的獅頭推銷兜售，豈料遇上紙紮店老闆以一句「呢個年代紮獅頭搵唔到食，不如你跟我做殯儀館紙紮啦」回應，但正因這盤冷水，讓許師傅誤打誤撞加入紮作行業，開展至今持續接近40年的紮作路。

既然紙紮店老闆都明言靠獅頭紮作謀生絕不容易，許師傅入行接觸到獅頭的機會，當然少之又少，雖然日紮夜紮都只有與獅頭風馬牛不相及的出品，不過這一紮，卻讓他學到無比專業的技巧，糾正以往靠自學的種種謬誤及不理解：「我入行跟咗兩個師傅，學識真正嘅紙紮。後來我日頭做紙紮，夜晚就紮自己嘅獅頭；起初冇人買，就整俾自己玩，然後慢慢開始唔收錢整俾武館其他師兄弟。」日夜被紮作包圍的生活持續13年後，許師傅終於蛻變成許老闆，創立紮作品牌「呂佳記」（1994年易名為「雄獅樓美術扎作」）。

獅頭紮作於香港曾風光一時，有價有市！許師傅於行業全盛時期，一年內製作過上百隻，價值約港幣 $15，000 的獅頭；雖然現時平均年產七、八十隻，但價格升幅不大，每隻售價約值港幣 $18，000-20，000，平均每隻更需耗時半個月製作。許師傅笑說「以前做紙紮師傅，紮條龍可以買得起個舖位，依家做一百條龍都冇可能買到」，言談間流露獅頭紮作師的唏噓。

「行業入面，真真正正靠全職紮獅頭搵食有幾多個呢？可能有啲係退休老師傅，兼職做；或者有啲有正職，因為興趣而做，真真正正專業地去做，三、兩個都冇。由始至終，我都係想紮獅頭，但就搵唔到食，直至依家都係，如果單靠獅頭就死得！」所以，專業紮作師都不得不認命，獅頭、龍頭、花炮、花燈，就連殯儀館紙紮亦照做，只求延續「獅頭夢」。

扭轉紙紮佬宿命 無所不能的藝術揚威澳洲

回想初踏入紮作行業，一心追尋「獅頭夢」，許師傅卻眼見前輩個個潦倒不堪，外界亦將其同行與低下階層掛勾：「啲師傅個個唔係拎綜援，就係瞓街收尾，要人救濟，感覺上個個都冇乜能力。以前啲人成日都話吹嗩吶、喃嘸佬、做紙紮都係道友，俾人感覺係讀唔成書，全部都係好差嘅人，就連我爸爸見我紮獅頭都勸我『唔好嘥時間』。」其後，因舞獅與紮作技藝，分別被列入香港非物質文化遺產清單的緣故，擁有獅頭紮作專業的許師傅，開始有更多機會以「傳承人」身份將手藝推向國際層面，同時為行業建立正面形象。

「啲人成日問我『紙紮佬係唔係乜都做到』，紙紮嘅神奇之處，基本上係無所不能！」傳統獅頭及其他紮作工藝，並非玩模型般有說明書逐步教學；師傅要憑經驗想像出所需材料尺寸，徒手製作出立體框架及完成後續工序。羅馬非一日建成，紮作師傅手藝之高超，亦只能靠年月累積，難怪「紙紮佬」被認同的喜悅，比得到其他榮耀來得更大。

講到最令許師傅引以為傲的作品，莫過於讓其手藝揚威澳洲的「大金龍」。2019年，雄獅樓獲澳洲政府邀請，為澳洲金龍博物館製作每50年更換一次，全長超過一百二十米的大金龍：「個項目做完之後，大家都認同我做龍嘅手藝。其實我有機會接觸到已經好難得，而且係由香港本地紮作師傅延續呢個歷史；我好希望再下一個50年，都係我哋香港嘅紮作師傅可以做到。」